ភ្នំពេញ៖ ក្នុងឱកាសអបអរសាទរ«ទិវាគ្រូបង្រៀន ៥តុលា» នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានអញ្ជើញទស្សនាកិច្ច និងសំណេះសំណាលជាមួយសិស្សនុសិស្សនៅតាមស្តង់ពិព័រណ៍ស្នាដៃនាព្រឹកថ្ងៃទី០៥ ខែតុលា ឆ្នាំ២០២៣ សម្តេចធិបតីរំភើប និងមានមោទកភាពដែលបានឃើញសិស្សានុសិស្សបង្កើតការច្នៃប្រឌិត និងធ្វើការស្រាវជ្រាវ និងបានចងក្រងជាសៀវភៅជាច្រើន។
សម្តេចធិបតី ថ្លែងដូច្នេះថា៖ «កុំខ្លាចវិនិយោគទៅលើការងារបង្កើតផលិតផលបែបនេះ កុំខា្លចវិនិយោគលើមនុស្សដើម្បីបង្កើតលទ្ធផលការងារសុម្រាប់ប្រទេសជាតិយើង។ ខ្ញុំសប្បាយចិត្តដែលសិស្សានុសិស្ស និងលោកគ្រូអ្នកគ្រូស្រាវជ្រាវចងក្រងជាសៀវភៅបានជាង ១ពាន់»។
នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានលើកទឹកចិត្តឱ្យសិស្សានុសិស្សមានវប្បធម៌ស្រាវជ្រាវ និងអានឱ្យបានច្រើន។ ជាមួយគ្នានេះសម្តេចធិបតីក៏បានជំរុញឱ្យគ្រូៗពង្រឹងលើសមត្ថភាពបង្រៀន និងការស្រាវជ្រាវផងដែរ។
សម្តេចធិបតីបានគូសបញ្ជាក់ថា លោកគ្រូអ្នកគ្រូដែលប្រឡងជាប់គ្រូគរុកោសល្យត្រូវបានរាជរដ្ឋាភិបាលលើកទឹកចិត្ត ដោយដំឡើងប្រាក់ខែបន្ថែមទៀតផងដែរ។
សម្តេចនាយករដ្ឋមន្ត្រីបានណែនាំឱ្យក្រសួងអប់រំ យុវជន និងកីឡា ពង្រឹងលើការអប់រំពីសិស្សថ្នាក់មត្តេយ្យដល់ថ្នាក់ទី១២ ដើម្បីឱ្យការអប់រំកាន់តែមានគុណភាពប្រសើរឡើង៕
